Un terzo dos casos de asma infantil vincúlase coa contaminación do aire

Investigadores do equipo do Instituto de Saúde Global de Barcelona ( ISGlobal), e o Institute for Transport Studies de Leeds (Reino Unido) aseguran que ata o 38% dos casos de asma infantil poden estar relacionados coa contaminación atmosférica. Así se desprende dos resultados dun estudo publicado na revista Environment International tras utilizar un modelo de novo desenvolvemento que analizou o impacto que ten a exposición aos óxidos de nitróxeno ( NOx) no desenvolvemento desta enfermidade respiratoria en nenos. A ferramenta utilizada aúna os datos doutros catro modelos distintos relativos a tráfico, emisións, dispersión atmosférica e estudo de impacto en saúde na cidade de Bradford, o que permitiu aos investigadores trazar toda a cadea de impacto, desde as fontes de contaminación do aire ata as vías polas que esta impacta a saúde dos nenos. Deste xeito, as estimacións do modelo mostraron que ata o 38% de todos os casos anuais de asma infantil en Bradford poden ser atribuíbles á contaminación do aire e, máis especificamente, o 12% atribuíronse á contaminación do aire relacionada co tráfico. "Sabiamos que o noso modelo estaba subestimando a fracción de contaminación atmosférica procedente do tráfico. Cando axustamos os nosos resultados usando medicións reais de contaminantes do aire vimos que ata o 24% dos casos anuais poderían atribuírse á contaminación do aire relacionada co tráfico", explicou Mark Nieuwenhuijsen, director da Iniciativa de Planificación Urbana, Medio Ambiente e Saúde de ISGlobal. Os investigadores recoñecen que as taxas de asma infantil en Bradford son máis altas que a media do Reino Unido, do mesmo xeito que os ingresos hospitalarios por urxencias de nenos asmáticos menores de 16 anos. Con todo, agora hase visto que unha parte importante destes casos son en boa medida prevenibles", apuntou Haneen Khreis, tamén autora do estudo.